Hodiaŭ, mi surpriziĝis trovi kombuĉon en kelkaj superbazaroj de mia urbo.
Kombuĉo estas trinkaĵo farita el fermentita teo. Ĝi kutime ne havas alkoholon (aŭ tre malmulte). Nigra teo estas fermentita per kolonio de specifaj bakterioj kaj fungoj, kiuj "manĝas" la sukeron aldonitan al teo, kaj transformas la guston al malforta acideco kaj unika gusto.
Tiu trinkaĵo estas tre malmulte konata, do mi surpriziĝas vidi ĝin vendita en normala superbazaro. Origine, la trinkaĵo venas de Ĉinio, kaj mi konis ĝin nur per Youtube-aj videoj kie ĝi estas produktata de hobiuloj.
Sed ŝajne ekzistas rapide kreskanta industrio en Nederlando. Kutime estas la samaj firmaoj kiuj produktas bierojn. (Kio sonas logika ĉar ili povas reuzi multajn aparatojn.)
Tamen la industria formo de kombuĉo estas tre malsama de la originala kombuĉo:
- la mikroorganismoj (de la kolonio) estas foje filtritaj, foje ne
- plej ofte varmo estas uzata por sekureco (pasteŭrizo), sed la rezulto estas produkto malsama ol la originalaĵo
- multe da aferoj estas aldonitaj (gustoj, karbona acido, sukeraj anstataŭaĵoj), verŝajne por igi la produkton malpli fremda al la konsumantoj kiuj tute ne konas la koncepton de kombuĉo
Por provi, mi aĉetis tian industrian kombuĉon. Ĉi tie ili estis disponeblaj nur en normaj ladskatoletoj. Mi provis BATU Kombucha pasifrukta gusto. Mi tre ŝatis la guston (mi vere ŝatas ĉion kio estas iom acida) kvankam la gusto de stevio (malvera sukero) estis tro forta. Bedaŭrinde mi ne povis trovi kombuĉon sen tia malvera sukero en la normalaj superbazaroj.
Kiam mi povos, mi iros al "naturbutiko" kiu havas multe da malofte konataj trinkaĵoj. Mi antaŭvidas ke mi trovos tie kombuĉon kiu pli bone respektas la originalan produktmanieron. Tio pli interesan min, ĉar mi volas sperti guston kiu pli malsamas de tio, kion mi jam konas.
Ĉiuokaze, mi feliĉiĝas pri la populariĝo de kombuĉo. Ĉia alternativo al alkohol-enhava trinkaĵo bonas. Mi nun scias kion peti en restoracio/trinkejo sen aspekti tro malmojosa.
